Über "Frauometer" und "Kender kriaga" / Teil 4
Bisingen-Thanheim. Wir stellen einmal wöchentlich in insgesamt fünf Teilen Mundart-Dichtungen aus Jo Schmiegs Büchlein vor. Heute Teil vier:
Emanzipation
Wenn da heit oane verdwischd, mo no neit reachd achtzeah ischd, ond saischd "Frailein" zu’nr, jemers! An baisa Blick kriagschd oder Schlemmers, no ka’dr saga: "Garantiert isch’s Menschle gwieß emanzipiert."
Haushalt schaffa, Kender kriaga ond no no uffzia, koa Vergniaga, dass des au schwerschde Arbed sei, goht heit vielleicht neit jedem ei.
Veil schdaod zerschd uff weagam Kaffee, om feive Feirobed? Oje! Feivadreißg Schtond e’r Woch zom messa koschd bei’ra Hausfrau glatt vergessa.
Wenn se em G’schäft’s gleich schaffe koh, ond trotzdeam weniger kriagt als an Moh.
Wenn se sogar en heitige Zeita emmer no miaßed om’s Wahlreacht schdreita, verschleieret gao miaßed, verschbrocha weand, schiaf oguggd, wenn se ledig schwanger send, wenn oanr nemme da Bus benützt, weil a Fahrerin henter’m Lenker sitzt, dass des id reacht ischd, mecht’e do schreiba, bloß kah ma’s, glaub’ i, au a weng iebertreiba.
Schdatt "Kaufmann" schreibt ma "Kauffrau" an’s Kontor, aber wie klengt au "Kauffräuische Lehre" em Ohr! Wenn dr Mah außer Haus ischd ond’s Werkzeug dengled, braucht’r koa Angschd hao, wenn d’Gasfrau klengled.
Wer woaß, wie lang des etz no goht, bis uff "Mannesmann-Aktien" "Frauesfrau" schdoht, bis es Fraufred schdatt Manfred hoaßt ond Fraudel schadatt Mandel, bis em Wenter send Fraudarina em Handel.
‘s Frauometer zoagt a, ob’s da Kessel verreißt, ond da Heizer in die "ewigen Jagdgründe" zum Frauitou schmeißt.
Em Wildlederfrautel schwebt’s da Laufschdeg rei, des miaßt jo eigentlich a Frauequin sei.
Jetzt isch aber Schluss mit dr Hoorschbalterei, i reich’ des Gedicht bei mei’m Frauager ei, was mi bloß wondred, ‘s isch doch dr Hohn: koa Mensch stört sich an dr E-MANN-zipation!
Nächste Woche:
"’s’ erschde Mädle"
Das Buch: Jo Schmieg "Liabr a Kälble wie an Herzinfarkt", 87 Seiten, 15 Euro, zu kaufen bei der Buchhandlung Rieger in Balingen